9.9°C Vancouver 9.9°C Vancouver
Mar 10, 2025 7:34 PM - Connect Newsroom
ਕੈਨੇਡਾ ਦੇ ਪ੍ਰਧਾਨ ਮੰਤਰੀ ਦੇ ਰੂਪ ਵਿਚ ਮਾਰਕ ਕਾਰਨੀ ਜਲਦ ਕਾਰਜਕਾਰ ਸੰਭਾਲ ਸਕਦੇ ਹਨ। ਕਾਰਨੀ ਵਲੋਂ ਅੱਜ ਪ੍ਰਧਾਨ ਮੰਤਰੀ ਦਫ਼ਤਰ ਵਿਚ ਟਰੂਡੋ ਨਾਲ ਤਬਦੀਲੀ ਯੋਜਨਾ 'ਤੇ ਚਰਚਾ ਕੀਤੀ ਗਈ ਹੈ। ਉਨ੍ਹਾਂ ਕਿਹਾ ਕਿ ਉਹ ਅਮਰੀਕਾ ਨਾਲ ਵਿਗੜੇ ਸੰਬੰਧਾਂ ਨੂੰ ਸੰਭਾਲਣ ਲਈ ਜਲਦ ਹੀ ਪ੍ਰੀਮੀਅਰ ਨਾਲ ਵੀ ਸੰਪਰਕ ਕਰਨਗੇ।
ਇਸ ਵਿਚਕਾਰ ਕਾਰਨੀ ਦੇ ਅੰਦਰੂਨੀ ਸੂਤਰਾਂ ਨੇ ਦੱਸਿਆ ਹੈ ਕਿ ਕੈਨੇਡਾ ਦੀਆਂ ਅਗਲੀਆਂ ਚੋਣਾਂ 28 ਅਪ੍ਰੈਲ ਜਾਂ 5 ਮਈ ਨੂੰ ਸੱਦੀਆਂ ਜਾ ਸਕਦੀਆਂ ਹਨ। ਜਾਣਕਾਰੀ ਮੁਤਾਬਕ, ਕਾਰਨੀ ਨਵੇਂ ਮੰਤਰੀ ਮੰਡਲ 'ਤੇ ਕੰਮ ਕਰ ਰਹੇ ਹਨ।
ਇਹ ਵੀ ਪਤਾ ਲੱਗਾ ਹੈ ਕਿ ਸਾਬਕਾ ਮੰਤਰੀ ਮਾਰਕੋ ਮੈਂਡੀਚੀਨੋ ਜਿਨ੍ਹਾਂ ਨੇ ਅਗਲੀਆਂ ਚੋਣਾਂ ਨਾ ਲੜਨ ਦਾ ਐਲਾਨ ਕੀਤਾ ਸੀ ਉਹ ਕਾਰਨੀ ਦੇ ਚੀਫ਼ ਆਫ਼ ਸਟਾਫ਼ ਨਿਯੁਕਤ ਹੋ ਸਕਦੇ ਹਨ। ਮੈਂਡੀਚੀਨੋ ਅੱਜ ਪਾਰਲੀਮੈਂਟ ਹਿੱਲ ਵਿਖੇ ਕਾਰਨੀ ਦੇ ਨਾਲ ਹੀ ਪਹੁੰਚੇ ਸਨ। ਇਸ ਵਿਚਕਾਰ ਮੁੱਖ ਵਿਰੋਧੀ ਧਿਰ ਦੇ ਲੀਡਰ ਪੀਅਰ ਪੌਲੀਐਵ ਨੇ ਕਾਰਨੀ 'ਤੇ ਹਮਲਾ ਬੋਲਿਆ ਹੈ।
ਪੌਲੀਐਵ ਨੇ ਕਿਹਾ ਕਿ ਕਾਰਨੀ ਖੁਦ ਦੇ ਉਸ ਰਿਕਾਰਡ ਨੂੰ ਲੁਕਾ ਰਹੇ ਹਨ, ਜਿਸ ਵਿਚ ਉਨ੍ਹਾਂ ਪੰਜ ਸਾਲ ਟਰੂਡੋ ਦੇ ਸਲਾਹਕਾਰ ਰਹਿਣ ਦੌਰਾਨ ਕਾਰਬਨ ਟੈਕਸ ਵਿਚ ਵਾਧਾ ਕਰਨ ਸਮੇਤ ਮਹਿੰਗਾਈ ਨੂੰ ਵਧਾਉਣ ਵਾਲੇ ਕੰਮਾਂ ਲਈ ਸਲਾਹਾਂ ਦਿੱਤੀਆਂ ਅਤੇ ਇਸ ਤੋਂ ਇਲਾਵਾ ਕਾਰਨੀ ਨੇ ਆਪਣੀ ਕੰਪਨੀ ਦਾ ਮੁੱਖ ਦਫਤਰ ਤੇ ਨੌਕਰੀਆਂ ਨੂੰ ਅਮਰੀਕਾ ਵਿਚ ਸ਼ਿਫਟ ਕੀਤਾ। ਉਨ੍ਹਾਂ ਕਿਹਾ ਕਿ ਕਾਰਨੀ ਆਪਣੇ ਕਈ ਸਕੈਂਡਲਸ ਤੋਂ ਧਿਆਨ ਭਟਾਉਣ ਦੀ ਕੋਸ਼ਿਸ਼ ਕਰ ਰਹੇ ਹਨ।
