ਕੈਨੇਡੀਅਨ ਫੈਡਰਲ ਚੋਣਾਂ: ਜਗਮੀਤ ਸਿੰਘ ਲਈ ਬਣੀਆਂ ਵੱਕਾਰ ਦਾ ਸਵਾਲ

ਕੈਨੇਡੀਅਨ ਫੈਡਰਲ ਚੋਣਾਂ ਦੇ ਸਰਵਿਆਂ ਵਿਚ ਪਿੱਛੇ ਚੱਲ ਰਹੀ ਐੱਨ.ਡੀ.ਪੀ. ਦੇ ਪ੍ਰਧਾਨ ਜਗਮੀਤ ਸਿੰਘ ਲਈ ਇਹ ਚੋਣਾਂ ਵੱਕਾਰ ਦਾ ਸਵਾਲ ਬਣ ਗਈਆਂ ਹਨ। ਐਨ.ਡੀ.ਪੀ. ਦੇ ਸਾਬਕਾ ਪ੍ਰਧਾਨ ਟਾਮ ਮੁਲਕੇਅਰ ਦਾ ਕਹਿਣਾ ਹੈ ਕਿ ਜੇ ਇਨ੍ਹਾਂ ਚੋਣਾਂ ਵਿਚ ਪਾਰਟੀ ਸੰਸਦ ਵਿਚ ਆਪਣੀ ਅਧਿਕਾਰਤ ਸਥਿਤੀ ਗੁਆ ਦਿੰਦੀ ਹੈ ਜਿਵੇਂ ਕਿ ਕੁਝ ਸਰਵਿਆਂ ਤੋਂ ਪਤਾ ਚੱਲਦਾ ਹੈ ਤਾਂ ਜਗਮੀਤ ਸਿੰਘ ਪ੍ਰਧਾਨ ਦੇ ਰੂਪ ਵਿਚ ਪਾਰਟੀ ਦੀ ਅਗਵਾਈ ਜਾਰੀ ਨਹੀਂ ਰੱਖ ਸਕਣਗੇ।

ਉਨ੍ਹਾਂ ਕਿਹਾ ਕਿ ਜੇ ਨਤੀਜੇ ਉਸੇ ਤਰ੍ਹਾਂ ਆਏ ਜਿਸ ਤਰ੍ਹਾਂ ਕਿ ਚੋਣਾਂ ਵਿਚ ਅਨੁਮਾਨ ਲਗਾਏ ਜਾ ਰਹੇ ਹਨ ਤਾਂ ਪਾਰਟੀ ਨੂੰ ਵਾਕਿਆ ਹੀ ਮੁਸ਼ਕਲ ਦੌਰ ਵਿਚੋਂ ਲੰਘਣਾ ਪਵੇਗਾ। ਪਿਛਲੀ ਵਾਰ ਐੱਨ.ਡੀ.ਪੀ. ਕੋਲ ਹਾਊਸ ਆਫ ਕਾਮਨਜ਼ ਵਿਚ 24 ਸੀਟਾਂ ਸਨ ਪਰ ਪੋਲਿੰਗ ਡੇਟਾ ਇਕੱਠਾ ਕਰਨ ਵਾਲੀ ਮੀਡੀਆ ਵੈੱਬਸਾਈਟ 338 ਕੈਨੇਡਾ ਦਾ ਕਹਿਣਾ ਸੀ ਕਿ ਜੇ 22 ਅਪ੍ਰੈਲ ਨੂੰ ਚੋਣਾਂ ਹੁੰਦੀਆਂ ਤਾਂ ਐੱਨਡੀਪੀ ਸਿਰਫ਼ ਨੌਂ ਸੀਟਾਂ ਹੀ ਜਿੱਤਦੀ, ਜਦੋਂ ਕਿ ਅਧਿਕਾਰਤ ਪਾਰਟੀ ਦਾ ਦਰਜਾ ਪ੍ਰਾਪਤ ਕਰਨ ਲਈ 12 ਸੀਟਾਂ ਦੀ ਲੋੜ ਹੁੰਦੀ ਹੈ।

ਉਥੇ ਹੀ, ਮੰਗਲਵਾਰ ਜਦੋਂ ਜਗਮੀਤ ਸਿੰਘ ਨੂੰ ਪੱਤਰਕਾਰਾਂ ਵਲੋਂ ਇਹ ਪੁੱਛਿਆ ਗਿਆ ਕਿ ਕੀ ਪਾਰਟੀ ਦਾ ਅਧਿਕਾਰਤ ਦਰਜਾ ਖਤਮ ਹੋਣ 'ਤੇ ਉਹ ਅਸਤੀਫਾ ਦੇ ਦੇਣਗੇ ਤਾਂ ਉਨ੍ਹਾਂ ਕਿਹਾ ਕਿ ਮੈਂ ਚੋਣਾਂ ਤੋਂ ਬਾਅਦ ਬਾਰੇ ਨਹੀਂ ਸੋਚ ਰਿਹਾ।