ਬ੍ਰਿਟਿਸ਼ ਕੋਲੰਬੀਆ ਦੀਆਂ ਚੋਣਾਂ ਦੇ ਨਤੀਜੇ ਅਗਲੇ ਹਫ਼ਤੇ ਤੱਕ ਹੋਣਗੇ ਸਪੱਸ਼ਟ

ਬ੍ਰਿਟਿਸ਼ ਕੋਲੰਬੀਆ ਦੀਆਂ ਚੋਣਾਂ ਦੇ ਅੰਤਿਮ ਨਤੀਜੇ ਘੱਟੋ-ਘੱਟ ਅਗਲੇ ਹਫਤੇ ਤੱਕ ਸਪੱਸ਼ਟ ਹੋਣਗੇ। ਸੂਬੇ ਦੇ ਇਲੈਕਸ਼ਨ ਕਮਿਸ਼ਨ ਦਾ ਕਹਿਣਾ ਹੈ ਕਿ ਉਸ ਨੇ ਦੋ ਸੀਟਾਂ ’ਤੇ ਵੋਟਾਂ ਦੀ ਗਿਣਤੀ ਦੁਬਾਰਾ ਕਰਨ ਦਾ ਫੈਸਲਾ ਕੀਤਾ ਹੈ, ਜਿੱਥੇ ਨਿਊ ਡੈਮੋਕਰੇਟ ਅਤੇ ਬੀ.ਸੀ. ਕੰਜ਼ਰਵੇਟਿਵ ਉਮੀਦਵਾਰਾਂ ਵਿਚਕਾਰ ਜਿੱਤ ਦਾ ਅੰਤਰ ਮਹਿਜ 100 ਵੋਟਾਂ ਦਾ ਆਇਆ ਹੈ। ਇਸ ਦਾ ਫਾਈਨਲ ਨਤੀਜਾ ਆਉਣ ਵਿਚ 26 ਤੋਂ 28 ਅਕਤੂਬਰ ਤੱਕ ਦਾ ਸਮਾਂ ਲੱਗ ਸਕਦਾ ਹੈ।

ਇਲੈਕਸ਼ਨ ਬੀ.ਸੀ. ਮੁਤਾਬਕ, ਸਰੀ ਸਿਟੀ ਸੈਂਟਰ ਅਤੇ ਜੁਆਨ ਡੀ ਫੁਕਾ-ਮਲਾਹਾਟ ਰਾਈਡਿੰਗਜ਼ ਦੋਵੇਂ ਸੀਟਾਂ ’ਤੇ ਐੱਨ. ਡੀ. ਪੀ. ਉਮੀਦਵਾਰਾਂ ਨੇ ਮਾਮੂਲੀ ਵੋਟਾਂ ਨਾਲ ਲੀਡ ਬਣਾਈ ਹੈ, ਜਿਸ ਕਾਰਨ ਇੱਥੇ ਦੁਬਾਰਾ ਗਿਣਤੀ ਹੋਵੇਗੀ। ਇਨ੍ਹਾਂ ਦੋਹਾਂ ਸੀਟਾਂ ਦੇ ਨਤੀਜੇ ਇਹ ਵੀ ਤੈਅ ਕਰਨਗੇ ਕਿ ਸੂਬੇ ਵਿਚ ਸਰਕਾਰ ਕਿਸ ਦੀ ਬਣੇਗੀ।

ਹੁਣ ਤੱਕ ਦੇ ਨਤੀਜਿਆਂ ਵਿਚ ਐੱਨ.ਡੀ.ਪੀ. ਨੂੰ 46 ਸੀਟਾਂ ਮਿਲੀਆਂ ਹਨ, ਜਦੋਂ ਕਿ ਕੰਜ਼ਰਵੇਟਿਵ 45 ਸੀਟਾਂ ਨਾਲ ਬਰਾਬਰ ਮੁਕਾਬਲੇ ਵਿਚ ਹਨ। ਉਥੇ ਹੀ, ਗ੍ਰੀਨ ਪਾਰਟੀ ਦੋ ਸੀਟਾਂ ਜਿੱਤੀ ਹੈ ਜੋ ਸਰਕਾਰ ਨਾ ਬਣਨ ਦੀ ਸੂਰਤ ਵਿਚ ਮੁੱਖ ਭੂਮਿਕਾ ਵਿਚ ਹੋਵੇਗੀ। ਸੂਬੇ ਵਿਚ ਕੁੱਲ 93 ਵਿਧਾਨ ਸਭਾ ਸੀਟਾਂ ਹਨ, ਕਿਸੇ ਵੀ ਪਾਰਟੀ ਨੂੰ ਬਹੁਮਤ ਵਾਲੀ ਸਰਕਾਰ ਬਣਾਉਣ ਲਈ 47 ਸੀਟਾਂ ਦੀ ਲੋੜ ਹੈ।

.