ਕੈਨੇਡਾ ਵਿਚ 28 ਅਪ੍ਰੈਲ ਨੂੰ ਵੋਟਿੰਗ ਤੋਂ ਪਹਿਲਾਂ ਲੱਖਾਂ ਕੈਨੇਡੀਅਨਾਂ ਨੂੰ ਕੈਨੇਡਾ ਕਾਰਬਨ ਰਿਬੇਟ ਦੀ ਆਖਰੀ ਪੇਮੈਂਟ ਮਿਲਣ ਜਾ ਰਹੀ ਹੈ। ਐਲਬਰਟਾ, ਨੋਵਾ ਸਕੋਸ਼ੀਆ ਸਮੇਤ ਜਿਨ੍ਹਾਂ 8 ਸੂਬਿਆਂ ਵਿਚ ਫੈਡਰਲ ਕਾਰਬਨ ਫਿਊਲ ਚਾਰਜ ਲਾਗੂ ਸੀ ਉਨ੍ਹਾਂ ਨੂੰ 22 ਅਪ੍ਰੈਲ ਤੋਂ ਕੈਨੇਡਾ ਕਾਰਬਨ ਰਿਬੇਟ ਦੀ ਅੰਤਿਮ ਅਦਾਇਗੀ ਪ੍ਰਾਪਤ ਹੋਵੇਗੀ। ਇਸੇ ਤਰ੍ਹਾਂ ਬ੍ਰਿਟਿਸ਼ ਕੋਲੰਬੀਆ ਵਾਸੀਆਂ ਨੂੰ ਬੀ.ਸੀ. ਜਲਵਾਯੂ ਕਾਰਵਾਈ ਟੈਕਸ ਕ੍ਰੈਡਿਟ ਦਾ ਅੰਤਿਮ ਭੁਗਤਾਨ ਮਿਲੇਗਾ।

ਨੌਰਥਈਸਟ ਕੈਲਗਰੀ ਦੇ ਡ੍ਰਮਹੈਲਰ ਵਿਚ ਰੱਖੇ ਦੁਨੀਆ ਦਾ ਸਭ ਤੋਂ ਵੱਡੇ ਡਾਇਨਾਸੌਰ ਦੇ ਬੁੱਤ ਨੂੰ ਹਟਾਉਣ ਦੀ ਖ਼ਬਰ ਮਗਰੋਂ ਲੋਕ ਇਸ ਨੂੰ ਬਚਾਉਣ ਲਈ ਮੁਹਿੰਮ ਚਲਾ ਰਹੇ ਹਨ। ਸਿਟੀ ਦੇ ਮੇਅਰ ਨੇ ਕਿਹਾ ਕਿ ਉਹ ਇਸ ਨੂੰ ਬਚਾਉਣ ਲਈ ਚੈਂਬਰ ਨਾਲ ਗੱਲ ਕਰ ਰਹੇ ਹਨ ਕਿਉਂਕਿ ਇਹ ਸਿਟੀ ਦੇ ਵਪਾਰ ਨੂੰ ਹੁਲਾਰਾ ਦੇ ਰਿਹਾ ਹੈ। ਟਾਇਰਨੋਸੌਰਸ ਕਈ ਸਾਲਾਂ ਤੋਂ ਸੈਲਾਨੀਆਂ ਲਈ ਖਿੱਚ ਦਾ ਕਾਰਨ ਰਿਹਾ ਹੈ।

ਐਲਬਰਟਾ ਸਰਕਾਰ ਨੇ 9 ਨਵੇਂ ਜ਼ਰੂਰੀ ਦੇਖਭਾਲ ਕੇਂਦਰ ਤਿਆਰ ਕਰਵਾਉਣ ਲਈ $17 ਮਿਲੀਅਨ ਖਰਚ ਕਰਨ ਦਾ ਐਲਾਨ ਕੀਤਾ ਹੈ। ਸਿਹਤ ਮੰਤਰੀ ਐਡਰੀਆਨਾ ਲਾਗਰੇਂਜ ਮੁਤਾਬਕ ਇਹ ਸੈਂਟਰ ਹਸਪਤਾਲਾਂ ਨਾਲੋਂ ਛੋਟੇ ਹੋਣਗੇ ਅਤੇ ਇੱਥੇ ਟੁੱਟੀਆਂ ਹੱਡੀਆਂ ਦਾ ਇਲਾਜ ਉਸੇ ਸਮੇਂ ਕੀਤਾ ਜਾਵੇਗਾ। ਸਿਹਤ ਮੰਤਰੀ ਨੇ ਕਿਹਾ ਕਿ ਇਸ ਨਾਲ ਹਸਪਤਾਲਾਂ 'ਤੇ ਬੋਝ ਘਟੇਗਾ। ਮਰੀਜ਼ਾਂ ਨੂੰ ਇਸ ਤਰ੍ਹਾਂ ਦੇ ਇਲਾਜ ਲਈ ਲੰਬੀਆਂ ਉਡੀਕਾਂ ਨਹੀਂ ਕਰਨੀਆਂ ਪੈਣਗੀਆਂ। ਇਸ ਨਾਲ ਹਸਪਤਾਲਾਂ ਦੇ ਐਮਰਜੈਂਸੀ ਰੂਮਜ਼ ਦੀ ਭੀੜ ਵੀ ਘਟੇਗੀ। ਇਹ ਸੈਂਟਰ ਐਡਮਿੰਟਨ,ਕੈਲਗਰੀ,ਫੋਰਟ ਮੈਕਮਰੀ,ਏਅਰਡ੍ਰੀ ਅਤੇ ਲੈਥਬ੍ਰਿਜ ਵਿਚ ਬਣਾਏ ਜਾਣਗੇ।

ਐਲਬਰਟਾ ਦੀ ਪ੍ਰੀਮੀਅਰ ਡੈਨੀਅਲ ਸਮਿਥ ਨੇ ਉਨ੍ਹਾਂ ਖਿਲਾਫ ਹੋ ਰਹੀ ਬਿਆਨਬਾਜ਼ੀ ਦਾ ਜਵਾਬ ਦਿੰਦਿਆਂ ਕਿਹਾ ਕਿ ਉਹ ਕੈਨੇਡਾ ਨੂੰ ਨੁਕਸਾਨ ਪਹੁੰਚਾਉਣ ਜਾ ਦੇਸ਼ ਨਾਲ ਧੋਖਾ ਨਹੀਂ ਕਰ ਰਹੀ। ਉਨ੍ਹਾਂ ਕਿਹਾ ਕਿ ਉਹ ਫਲੋਰੀਡਾ ਇਸੇ ਲਈ ਜਾ ਰਹੀ ਹੈ ਤਾਂ ਕਿ ਅਮੀਰੀਕੀ ਔਫੀਸ਼ੀਅਲਜ਼ ਦੀ ਰਾਇ ਬਦਲੀ ਜਾ ਸਕੇ। ਜਿਸ ਅਮਰੀਕੀ ਪੌਡਕਾਸਟਰ ਨਾਲ ਉਸ ਨੇ ਸਟੇਜ ਸਾਂਝੀ ਕਰਨੀ ਹੈ, ਉਸ ਨੂੰ ਸੁਣਨ ਵਾਲੇ ਰਾਸ਼ਟਰਪਤੀ ਡੋਨਲਡ ਟਰੰਪ ਦੇ ਕਰੀਬੀ ਹਨ। ਜੇਕਰ ਉਨ੍ਹਾਂ ਤੱਕ ਉਹ ਟੈਰਿਫ ਘਟਾਉਣ ਦਾ ਸੁਨੇਹਾ ਪਹੁੰਚਾ ਸਕੇਗੀ ਤਾਂ ਕੈਨੇਡਾ ਨੂੰ ਇਸ ਦਾ ਫਾਇਦਾ ਜ਼ਰੂਰ ਹੋਵੇਗਾ।

ਐਲਬਰਟਾ ਦੀ ਪ੍ਰੀਮੀਅਰ ਡੈਨੀਅਲ ਸਮਿਥ ਵੀਰਵਾਰ ਨੂੰ ਅਮਰੀਕਾ ਦੇ ਫਲੋਰੀਡਾ ਵਿਚ ਇਕ ਇਵੈਂਟ ਵਿਚ ਸ਼ਾਮਲ ਹੋਣ ਜਾ ਰਹੇ ਹਨ, ਜਿੱਥੇ ਅਮਰੀਕੀ ਪੌਡਕਾਸਟਰ ਬੈਨ ਸ਼ਪੀਰੋ ਪ੍ਰਮੁੱਖ ਸਪੀਕਰ ਹੋਣਗੇ।

ਐਡਮਿੰਟਨ ਦੀ ਨਿਊ ਡੈਮੋਕਰੇਟ ਪਾਰਟੀ ਦੇ ਲੰਬੇ ਸਮੇਂ ਤੋਂ ਵਿਧਾਇਕ ਰੌਡ ਲੋਯੋਲਾ ਨੇ ਆਪਣੇ ਅਹੁਦੇ ਤੋਂ ਅਸਤੀਫਾ ਦੇ ਦਿੱਤਾ ਹੈ। ਉਹ ਪਹਿਲੀ ਵਾਰ 2015 ਵਿਚ ਚੁਣੇ ਗਏ ਸਨ ਅਤੇ ਦੋ ਸਾਲ ਪਹਿਲਾਂ ਐਡਮਿੰਟਨ -ਐਲਰਸਲੀ ਰਾਈਡਿੰਗ ਤੋਂ ਤੀਜੀ ਵਾਰ ਜਿੱਤੇ। ਉਨ੍ਹਾਂ ਦਾ ਅਸਤੀਫਾ ਅੱਜ ਤੋਂ ਹੀ ਸਵਿਕਾਰ ਕੀਤਾ ਗਿਆ ਹੈ। ਉਨ੍ਹਾਂ ਨੇ ਆਪਣੀ ਅਗਲੀ ਯੋਜਨਾ ਬਾਰੇ ਫਿਲਹਾਲ ਕੋਈ ਜਾਣਕਾਰੀ ਨਹੀਂ ਦਿੱਤੀ।

ਐਲਬਰਟਾ ਦੀ ਪ੍ਰੀਮਅਰ ਡੈਨੀਅਲ ਸਮਿਥ ਨੇ ਆਪਣੇ ਦਫਤਰ ਦੇ ਬਜਟ ਖਰਚੇ ਵਿਚ ਹੋਏ ਵਾਧੇ ਦਾ ਵਿਰੋਧੀ ਧਿਰ ਨੂੰ ਜਵਾਬ ਦਿੱਤਾ ਹੈ। ਉਨ੍ਹਾਂ ਦੱਸਿਆ ਕਿ ਊਰਜਾ ਮੰਤਰਾਲੇ ਵਲੋਂ ਤੇਲ ਤੇ ਗੈਸ ਉਦਯੋਗ ਦੇ ਖਰਚ ਲਈ ਇਸ ਦੀ ਵਰਤੋਂ ਕੀਤੀ ਗਈ ਹੈ। ਸਮਿਥ ਨੇ ਬੀਤੇ ਦਿਨ ਵਿਧਾਨਿਕ ਕਮੇਟੀ ਦੀ ਮੀਟਿੰਗ ਦੌਰਾਨ ਵਿਰੋਧੀ ਧਿਰ ਅਤੇ ਯੂਨਾਈਟਿਡ ਕੰਜ਼ਰਵੇਟਿਵ ਦੇ ਬੈਕਬੈਂਚਰ ਨੂੰ ਸਵਾਲਾਂ ਦੇ ਜਵਾਬ ਦਿੱਤੇ। ਉਨ੍ਹਾਂ ਕਿਹਾ ਕਿ $4.8-ਮਿਲੀਅਨ ਦੇ ਵਾਧੇ ਨਾਲ ਵਿਵਾਦਿਤ ਕੈਨੇਡੀਅਨ ਊਰਜਾ ਕੇਂਦਰ ਨੂੰ ਸਰਕਾਰ ਵਿਚ ਸ਼ਾਮਿਲ ਕਰਨ ਦੀ ਪ੍ਰਕਿਰਿਆ ਪੂਰੀ ਹੋ ਜਾਵੇਗੀ।

ਐਲਬਰਟਾ ਦੀ ਸਿਹਤ ਮੰਤਰੀ ਨੇ ਐਡਮਿੰਟਨ ਸਣੇ ਕੁਝ ਇਲਾਕਿਆਂ ਵਿਚ ਖਸਰੇ ਦੇ ਮਾਮਲੇ ਸਾਹਮਣੇ ਆਉਣ ਮਗਰੋਂ ਲੋਕਾਂ ਨੂੰ ਜ਼ਰੂਰੀ ਟੀਕਾਕਰਨ ਕਰਵਾਉਣ ਦੀ ਸਲਾਹ ਦਿੱਤੀ ਹੈ। ਉਨ੍ਹਾਂ ਕਿਹਾ ਕਿ ਸਟੌਲਰੀ ਚਿਲਡਰਨ ਹਸਪਤਾਲ ਅਤੇ ਨੌਰਥ ਮੈਡੀਕਲ ਕਲੀਨਿਕ ਤੋਂ ਐਤਵਾਰ ਰਾਤ ਖਸਰੇ ਦੇ ਮਾਮਲਿਆਂ ਦੀ ਪੁਸ਼ਟੀ ਹੋਣ ਮਗਰੋਂ ਚਿੰਤਾ ਵੱਧ ਗਈ ਹੈ।

ਫੋਰਟ ਮੈਕਮਰੀ ਦੇ ਐਜੂਕੇਸ਼ਨ ਵਰਕਰਜ਼ ਲੰਬੀ ਹੜਤਾਲ ਮਗਰੋਂ ਬੁੱਧਵਾਰ ਨੂੰ ਸਕੂਲ ਵਾਪਸ ਆ ਸਕਦੇ ਹਨ। ਫੋਰਟ ਮੈਕਮਰੀ ਦੇ ਦੋ ਸਕੂਲ ਜ਼ਿਲ੍ਹੇ ਅਤੇ ਹੜਤਾਲ ਕਰਨ ਵਾਲੇ ਕਾਮਿਆਂ ਦੀ ਨੁਮਾਇੰਦਗੀ ਕਰਨ ਵਾਲੀ ਯੂਨੀਅਨ ਵਿਚਕਾਰ ਸਮਝੌਤੇ ਮਗਰੋਂ ਇਹ ਫੈਸਲਾ ਲਿਆ ਗਿਆ ਹੈ।