ਬੀ.ਸੀ. ਆਈਲੈਂਡ ਦੇ ਸਾਵਰੀ ਆਈਲੈਂਡ ਵਿਚ ਘਰ ਦੀ ਮੁਰੰਮਤ ਦੌਰਾਨ ਹਾਦਸਾ ਵਾਪਰਨ ਕਾਰਨ ਦੋ ਵਿਅਕਤੀਆਂ ਦੀ ਮੌਤ ਹੋ ਗਈ ਅਤੇ ਇਕ ਜ਼ਖਮੀ ਹੋ ਗਿਆ। ਪਾਵੇਲ ਰਿਵਰ ਆਰ.ਸੀ.ਐਮ.ਪੀ. ਮੁਤਾਬਕ ਇਹ ਹਾਦਸਾ 6 ਅਪ੍ਰੈਲ ਨੂੰ ਦੁਪਹਿਰ ਕਰੀਬ 2 ਵਜੇ ਵਾਪਰਿਆ। ਔਫੀਸਰਜ਼ ਨੇ ਦੱਸਿਆ ਕਿ ਪੈਟਰੀਸ਼ੀਆ ਕ੍ਰੇਸੈਂਟ ਵਿਚ ਮੁਰੰਮਤ ਅਧੀਨ ਘਰ ਢਹਿਣ ਕਾਰਨ ਦੋ ਵਿਅਕਤੀ ਇਸ ਹੇਠ ਦੱਬ ਗਏ ਸਨ।

ਐਲਬਰਟਾ ਸਰਕਾਰ ਨੇ ਜੰਗਲੀ ਅੱਗ ਤੋਂ ਬਚਾਅ ਲਈ ਨਵੇਂ 150 ਮੌਸਮ ਸਟੇਸ਼ਨ ਨੂੰ ਅਪਗ੍ਰੇਡ ਕਰਨ ਲਈ $900,000 ਦੀ ਘੋਸ਼ਣਾ ਕੀਤੀ ਹੈ। ਸੂਬੇ ਵਿਚ ਦੋ ਸਾਲਾਂ ਬਾਅਦ ਪਹਿਲੀ ਵਾਰ ਹੋਇਆ ਕਿ ਅਜੇ ਜੰਗਲੀ ਅੱਗ ਦਾ ਖਤਰਾ ਨਹੀਂ ਵਧਿਆ। ਪਿਛਲੇ ਸਾਲ 1 ਜਨਵਰੀ ਨੂੰ ਜਿੱਥੇ 64 ਵਾਈਲਡਫਾਇਰ ਐਕਟਿਵ ਸਨ, ਉੱਥੇ ਹੀ ਇਸ ਸਾਲ ਇਨ੍ਹਾਂ ਦੀ ਗਿਣਤੀ ਸਿਰਫ 6 ਰਹੀ।

ਐਲਬਰਟਾ ਦੀ ਵਿਰੋਧੀ ਧਿਰ ਐਨ.ਡੀ.ਪੀ. ਦੇ ਲੀਡਰ ਨਾਹੀਦ ਨੈਨਸ਼ੀ ਨੇ ਮਿਊਂਸੀਪਲ ਕੌਂਸਲ ਦੇ ਆਚਾਰ ਸੰਹਿਤਾ ਨੂੰ ਹਟਾਉਣ ਵਾਲੇ ਸਰਕਾਰ ਵਲੋਂ ਪ੍ਰਸਤਾਵਿਤ ਬਿੱਲ ਦੀ ਨਿੰਦਾ ਕੀਤੀ ਹੈ। ਉਨ੍ਹਾਂ ਕਿਹਾ ਕਿ ਇਸ ਨਾਲ ਧੋਖਾਧੜੀ ਅਤੇ ਅਪਰਾਧਿਕ ਮਾਮਲੇ ਵਧਣਗੇ। ਉਨ੍ਹਾਂ ਕਿਹਾ ਕਿ ਇਹ ਸਥਾਨਕ ਵੋਟਰਜ਼ ਦਾ ਅਪਮਾਨ ਹੈ।

ਐਲਬਰਟਾ ਸਰਕਾਰ ਨੇ ਚੁਣੇ ਗਏ ਪਬਲਿਕ ਸਕੂਲ ਬੋਰ਼ਡਜ਼ ਅਤੇ ਮਿਊਂਸੀਪਲ ਕੌਂਸਲਾਂ ਦੀਆਂ ਸ਼ਕਤੀਆਂ ਘਟਾਉਣ ਲਈ ਬੀਤੇ ਦਿਨ ਵਿਧਾਨਸਭਾ ਵਿਚ ਦੋ ਬਿੱਲ ਪੇਸ਼ ਕੀਤੇ। ਇਕ ਬਿੱਲ ਦੇ ਪਾਸ ਹੋਣ ਨਾਲ ਲੋਕਲ ਕੌਂਸਲਜ਼ ਦੇ ਆਚਾਰ ਸੰਹਿਤਾ ਨੂੰ ਰੱਦ ਕਰ ਦਿੱਤਾ ਜਾਵੇਗਾ । ਇਸ ਦੇ ਨਾਲ ਹੀ ਜੋ ਸ਼ਿਕਾਇਤਾਂ ਅਜੇ ਅਦਾਲਤ ਵਿਚ ਪੇਸ਼ ਨਹੀਂ ਹੋਈਆਂ ਉਹ ਵੀ ਰੱਦ ਹੋਣਗੀਆਂ।

ਐਡਮਿੰਟਨ ਦੀ ਇਕ ਟੀਨਏਜਰ ਨੂੰ ਅਗਵਾ ਕਰਕੇ ਉਸ ਦਾ ਜਿਨਸੀ ਸ਼ੋਸ਼ਣ ਕਰਨ ਵਾਲੇ ਅਮਰੀਕੀ ਦੋਸ਼ੀ ਨੂੰ 50 ਸਾਲਾਂ ਦੀ ਸਜ਼ਾ ਸੁਣਾਈ ਗਈ ਹੈ। ਨੋਹ ਮਦਰਾਨੋ ਨੂੰ ਜਨਵਰੀ 2022 ਵਿਚ 13 ਸਾਲਾ ਲੜਕੀ ਨੂੰ ਅਗਵਾ ਕਰਨ ਅਤੇ ਹਮਲੇ ਸਬੰਧੀ ਦੋ ਅਮਰੀਕੀ ਅਪਰਾਧਾਂ ਲਈ ਦੋਸ਼ੀ ਠਹਿਰਾਇਆ ਗਿਆ ਸੀ।

ਐਲਬਰਟਾ ਹੈਲਥ ਸਰਵਿਸਿਜ਼ ਨੇ ਮੰਗਲਵਾਰ ਸੂਬੇ ਵਿਚ ਖਸਰੇ ਦੇ 7 ਨਵੇਂ ਮਾਮਲਿਆਂ ਦੀ ਪੁਸ਼ਟੀ ਕੀਤੀ ਹੈ, ਜਿਸ ਨਾਲ ਪੀੜਤਾਂ ਦੀ ਕੁੱਲ ਗਿਣਤੀ 43 ਹੋ ਗਈ ਹੈ। ਇਨ੍ਹਾਂ ਵਿਚੋਂ 39 ਮਰੀਜ਼ 18 ਤੋਂ ਘੱਟ ਉਮਰ ਦੇ ਹਨ। ਇਹ ਮਾਮਲੇ ਸੂਬੇ ਦੇ 5 ਸਿਹਤ ਜ਼ੋਨ ਵਿਚ ਦੇਖਣ ਨੂੰ ਮਿਲੇ ਹਨ।

ਐਲਬਰਟਾ ਸਰਕਾਰ ਨਗਰਪਾਲਿਕਾਵਾਂ ਲਈ ਨਵੀਂ ਸੁਤੰਤਰ ਪੁਲਿਸ ਏਜੰਸੀ ਲਿਆਉਣ ਦੀ ਤਿਆਰੀ ਕਰ ਰਹੀ ਹੈ। ਬੀਤੇ ਦਿਨ ਸਰਕਾਰ ਨੇ ਬਿੱਲ 49 ਪੇਸ਼ ਕੀਤਾ ਹੈ। ਜੇਕਰ ਇਹ ਪਾਸ ਹੁੰਦਾ ਹੈ ਤਾਂ ਕਮਿਊਨੀਟੀਜ਼ ਨੂੰ ਪੁਲਿਸ ਫੋਰਸ ਲਈ ਨਵੀਂ ਏਜੰਸੀ ਚੁਣਨ ਦਾ ਅਧਿਕਾਰ ਹੋਵੇਗਾ। ਹਾਲਾਂਕਿ ਇਸ ਦੇ ਬਾਵਜੂਦ ਆਰ.ਸੀ.ਐਮ.ਪੀ. ਸੂਬੇ ਦੀ ਔਫੀਸ਼ੀਅਲ ਸਰਵਿਸ ਲਈ ਮੌਜੂਦ ਰਹੇਗੀ।

ਐਡਮਿੰਟਨ ਦੇ ਸ਼ੇਰਵੁੱਡ ਪਾਰਕ ਵਿਚ ਕੈਨੇਡੀਅਨ ਫੌਜੀ ਦੇ ਬੁੱਤ ਨੂੰ ਨੁਕਸਾਨ ਪਹੁੰਚਾਉਣ ਵਾਲੇ ਵਿਅਕਤੀ ਨੂੰ ਚਾਰਜ ਕੀਤਾ ਗਿਆ ਹੈ। ਉਸ ਨੇ 21 ਮਾਰਚ ਨੂੰ ਸੈਮ ਸਟੀਲ ਦੇ ਲੱਕੜ ਦੇ ਬਣੇ ਬੁੱਤ ਨੂੰ ਅੱਗ ਲਗਾ ਦਿੱਤੀ ਸੀ। ਸਟੀਲ 19ਵੀਂ ਅਤੇ 20ਵੀਂ ਸਦੀ ਦੇ ਸ਼ੁਰੂਆਤ ਵਿਚ ਉੱਤਰ-ਪੱਛਮੀ ਮਾਊਂਟੇਡ ਪੁਲਿਸ ਅਤੇ ਕੈਨੇਡੀਅਨ ਫੌਜ ਵਿਚ ਸ਼ਾਮਿਲ ਰਹੇ ਸਨ। ਉਨ੍ਹਾਂ ਦਾ ਬੁੱਤ ਅਗਸਤ 2013 ਵਿਚ ਬ੍ਰੌਡਮੂਰ ਬੁਲੇਵਾਰਡ ਵਿਚ ਰੱਖਿਆ ਗਿਆ ਸੀ। ਬੁੱਤ ਨੂੰ ਅੱਗ ਲਾ ਕੇ ਸਾੜਨ ਦੇ ਦੋਸ਼ ਵਿਚ ਸ਼ੇਰਵੁੱਡ ਪਾਰਕ ਦੇ ਰਹਿਣ ਵਾਲੇ 23 ਸਾਲਾ ਵਿਅਕਤੀ ਨੂੰ ਹਿਰਾਸਤ ਵਿਚ ਲਿਆ ਗਿਆ ਸੀ। ਉਸ ਨੂੰ ਬੁੱਧਵਾਰ ਅਦਾਲਤ ਵਿਚ ਪੇਸ਼ ਕੀਤਾ ਜਾਣਾ ਹੈ।

ਐਲਬਰਟਾ ਸਰਕਾਰ ਹਸਪਤਾਲਾਂ ਵਿਚ ਸਰਜਰੀਆਂ ਲਈ ਫੰਡਿੰਗ ਦੇ ਮਾਡਲ ਨੂੰ ਬਦਲਣ ਦੀ ਤਿਆਰੀ ਕਰ ਰਹੀ ਹੈ। ਪ੍ਰੀਮੀਅਰ ਡੈਨੀਅਲ ਸਮਿਥ ਨੇ ਬੀਤੇ ਦਿਨ ਐਲਾਨ ਕੀਤਾ ਕਿ ਉਹ ਨਵਾਂ ਮਾਡਲ ਲਿਆ ਰਹੇ ਹਨ ਜੋ 2026 ਵਿਚ ਕੁਝ ਸਰਜਰੀਆਂ ਲਈ ਲਾਗੂ ਕੀਤਾ ਜਾਵੇਗਾ।