ਇੱਕ ਵਾਰ ਫਿਰ ਦਿਲਜੀਤ ਦੁਸਾਂਝ ਨੇ ਕਰਵਾਈ ਪੰਜਾਬੀਆਂ ਦੀ ਬੱਲੇ-ਬੱਲੇ, ਗਾਇਕ ਨੇ ਰਚਿਆ ਵੱਡਾ ਇਤਿਹਾਸ

ਪੰਜਾਬੀ ਗਾਇਕ ਅਤੇ ਅਦਾਕਾਰ ਦਿਲਜੀਤ ਦੁਸਾਂਝ ਨੇ ਇੱਕ ਵਾਰ ਫਿਰ ਦੇਸ਼ ਦਾ ਨਾਂ ਰੌਸ਼ਨ ਕੀਤਾ ਹੈ। ਉਹ ਕੈਨੇਡਾ ਦੇ ‘ਬਿਲਬੋਰਡ ਮੈਗਜ਼ੀਨ’ ਦੇ ਪਹਿਲੇ ਪ੍ਰਿੰਟ ਐਡੀਸ਼ਨ ਵਿੱਚ ਨਜ਼ਰ ਆਉਣ ਵਾਲੇ ਪਹਿਲੇ ਭਾਰਤੀ ਕਲਾਕਾਰ ਬਣ ਗਏ ਹਨ। ਬਿਲਬੋਰਡ ਸਭ ਤੋਂ ਮਸ਼ਹੂਰ ਅਮਰੀਕੀ ਸੰਗੀਤ ਮੈਗਜ਼ੀਨ ਹੈ ਅਤੇ ਕੈਨੇਡਾ ਵਿੱਚ ਇਸਦਾ ਪਹਿਲਾਂ ਐਡੀਸ਼ਨ ਇਸ ਹਫ਼ਤੇ ਆ ਰਿਹਾ ਹੈ। ਮੈਗਜ਼ੀਨ ਦੇ ਪਹਿਲੇ ਪ੍ਰਿੰਟ ਐਡੀਸ਼ਨ ਵਿੱਚ ਦਿਲਜੀਤ ਦੇ ਦਿਲ-ਲੁਮਿਨਾਤੀ ਟੂਰ ਤੋਂ ਵਿਸ਼ੇਸ਼ ਸਮੱਗਰੀ ਸ਼ਾਮਲ ਹੋਵੇਗੀ।

ਇਹ ਖਬਰ ਸ਼ਨੀਵਾਰ ਨੂੰ ਬਿਲਬੋਰਡ ਕੈਨੇਡਾ ਦੇ ਅਧਿਕਾਰਤ ਇੰਸਟਾਗ੍ਰਾਮ ਅਕਾਊਂਟ ’ਤੇ ਸਾਂਝੀ ਕੀਤੀ ਗਈ। ਉਸਨੇ ਪੋਸਟ ਦੇ ਕੈਪਸ਼ਨ ਵਿੱਚ ਲਿਖਿਆ, ’ਦਿਲਜੀਤ ਦੁਸਾਂਝ ਬਿਲਬੋਰਡ ਦੇ ਇੱਕ ਵਿਸ਼ੇਸ਼ ਐਡੀਸ਼ਨ ਵਿੱਚ ਕਵਰ-ਟੂ-ਕਵਰ ਪੇਸ਼ ਕਰਨ ਵਾਲੇ ਪਹਿਲੇ ਭਾਰਤੀ ਕਲਾਕਾਰ ਵਜੋਂ ਵਿਸ਼ਵ ਇਤਿਹਾਸ ਰਚਣਗੇ। ਇਹ ਵੱਕਾਰੀ ਪ੍ਰਕਾਸ਼ਨ ਲਈ ਯਾਦਗਾਰੀ ਪਲ ਹੈ।’ ਉਨ੍ਹਾਂ ਕਿਹਾ ਕਿ ਇਸ ਵਿਸ਼ੇਸ਼ ਸੰਸਕਰਨ ’ਚ ’ਦਿਲ ਲੂਮਿਨਤੀ’ ਦੇ ਦੌਰੇ ਦੀਆਂ ਫੋਟੋਆਂ, ਇੰਟਰਵਿਊ ਅਤੇ ਪਰਦੇ ਦੇ ਪਿੱਛੇ ਦੀਆਂ ਕਹਾਣੀਆਂ ਪੇਸ਼ ਕੀਤੀਆਂ ਜਾਣਗੀਆਂ।

ਤੁਹਾਨੂੰ ਦੱਸ ਦੇਈਏ ਕਿ ਮੈਗਜ਼ੀਨ ਦਾ ਕਵਰ ਲੰਡਨ ’ਚ ਦਿਲਜੀਤ ਦੇ ਕੰਸਰਟ ’ਚ ਲਾਂਚ ਕੀਤਾ ਗਿਆ ਸੀ। ਜਿਵੇਂ ਹੀ ਇਹ ਖਬਰ ਸੋਸ਼ਲ ਮੀਡੀਆ ’ਤੇ ਆਈ ਤਾਂ ਦਿਲਜੀਤ ਦੇ ਪ੍ਰਸ਼ੰਸਕਾਂ ਨੇ ਉਨ੍ਹਾਂ ਦੀ ਤਾਰੀਫ ਕਰਨੀ ਸ਼ੁਰੂ ਕਰ ਦਿੱਤੀ।

ਤੁਹਾਨੂੰ ਦੱਸ ਦੇਈਏ ਕਿ ਦਿਲਜੀਤ ਪਿਛਲੇ ਕਈ ਹਫ਼ਤਿਆਂ ਤੋਂ ਅਮਰੀਕਾ ਅਤੇ ਯੂਰਪ ਦੇ ਦੌਰੇ ’ਤੇ ਹਨ। ਆਪਣਾ ਵਿਦੇਸ਼ ਦੌਰਾ ਪੂਰਾ ਕਰਨ ਤੋਂ ਬਾਅਦ ਦਿਲਜੀਤ ਇਸ ਅਕਤੂਬਰ ਵਿੱਚ ਆਪਣੇ ਦੌਰੇ ਦਾ ਭਾਰਤੀ ਪੜਾਅ ਸ਼ੁਰੂ ਕਰਨ ਲਈ ਤਿਆਰ ਹੈ। ਇਹ ਦੌਰਾ 26 ਅਕਤੂਬਰ ਨੂੰ ਨਵੀਂ ਦਿੱਲੀ ਦੇ ਜਵਾਹਰ ਲਾਲ ਨਹਿਰੂ ਸਟੇਡੀਅਮ ਤੋਂ ਸ਼ੁਰੂ ਹੋਵੇਗਾ। ਦਿੱਲੀ ਤੋਂ ਬਾਅਦ ਇਹ ਹੈਦਰਾਬਾਦ, ਅਹਿਮਦਾਬਾਦ, ਲਖਨਊ, ਪੂਨੇ, ਕੋਲਕਾਤਾ, ਬੈਂਗਲੁਰੂ, ਇੰਦੌਰ, ਚੰਡੀਗੜ੍ਹ ਅਤੇ ਗੁਹਾਟੀ ਜਾਵੇਗੀ।